Jú – hann byrjar “hreyfingu”…

Í þessu myndbandi er frumkvöðullinn í fyrstu einn og einmana að dansa trylltan dans. Fljótlega bætist einn í viðbót við. Þegar sá þriðji kemur í hópinn verður SPRENGING – allir hópast að og taka þátt.

Þessir þrír fyrstu gegna mikilvægasta hlutverkinu. Fyrsti með því að sýna þolinmæði og halda áfram þó það geti verið vandræðalegt. Annar með því að sýna samstöðu. Sá þriðji gegnir greinilega því hlutverki að koma örðum til að sjá þetta sem hópathöfn sem gaman er að taka þátt í.

Myndbandið sýnir líka hvernig vírusar virka smitandi (ekki þessir líffræðilegu – heldur félagslegu).

Lærdómur: Haltu áfram að dansa!

Seth Godin upp á sitt besta. Seth sýnir hvernig vefurinn er að breyta markaðssetningu frá massa markaðssetningu yfir í meiri áherslu á mannlega þáttinn. Fólk kemur saman og býr til hópa í kring um ákveðnar hugmyndir og gildi og er leitt áfram af leiðtoga. Þessar nýju félagseiningar eru sem bergmál fortíðar sem við þekkjum sem ættbálka.

Seth hvetur okkur til að fá hugmynd sem er þess virði og koma af stað hreyfingu. Þú getur leitt hreyfingu og fengið venjulegt fólk til að fylga henni og í sameiningu getið þið stuðlað að miklum breytingum.

Í nýjasta blaði Viðskiptablaðsins er viðtal við Þránd Arnþórsson, tæknistjóra Expert og framkvæmdastjóra Álfatungls.

Viðskiptablaðið 30. apríl 2009:

Sprotafyrirtæki: Expert og Álfatungl í einum og sama manninum

Þrándur Arnþórsson hefur unnið að uppbyggingu tveggja fyrirtækja sem vinna markaðsstarf sitt í gegnum netið þótt starfsemi þeirra sé að öðru leiti ólík.

SIGURÐUR MÁR JÓNSSON
siggi@vb.is

Þrátt fyrir að vefir séu snar þáttur af íslensku viðskiptalífi þá er ekki algengt að menn reyni fyrir sér erlendis með sérhæfða vefi. Á því eru þó undantekningar. Fyrirtækið Álfatungl ehf. á og rekur nokkra vefi sem eru byggðir upp með það fyrir augum að þeir nái markaðshlutdeild á alþjóðlegum markaði. Að sögn Þrándar Arnþórssonar, framkvæmdastjóra félagsins,  hefur gengið býsna vel að byggja þá upp og ná athygli erlendis.  Stærsti vefurinn er 4×4OffRoads.com sem Þrándur segir að fái 10 til 12 þúsund gesti á dag. Vefsala.com er íslenski hlutinn af starfseminni og ætlað að gefa góð ráð um skynsamlega notkun vefsins sem markaðstækis, segir Þrándur. Allar tekjur vefjanna koma erlendis frá en auglýsingar frá Google AdSense og eBay eru þar stærsti þátturinn segir Þrándur. En hver er ávinningurinn af því að hafa alþjóðlega vefi á Íslandi?

“Ávinningurinn er kannski mestur í að nýta sér hraðan vöxt vefsins, sem stækkar ört þrátt fyrir alheimskreppu. Þarna eru tækifæri fyrir fólk sem vill prófa nýjar leiðir og skapa sér tekjur með örlítið öðruvísi hugsun og framkvæmd. Mér finnst þróunin vera mjög spennandi og gaman að taka þátt í þessu,” segir Þrándur.

Opin nýsköpun

En Þrándur er með fleira í gangi um þessar mundir. Hann hefur ásamt tveimur öðrum sérfræðingum unnið að stofnun sprotafyrirtækisins Expert ehf. (expert.is). Fyrirtækið býður heildræna hugbúnaðarþróun, verkefnastjórnun og stjórnun verkefnastofna, fjármála- og áhættugreiningu, viðskiptagreiningu og endurhönnun viðskiptaferla. “Expert byggir á hugmyndum um opna nýsköpun, þar sem sérfræðingar eru ráðnir til ákveðinna afmarkaðra verkefna, en eru ekki fastir í einu fyrirtæki til lengri tíma,” sagði  Þrándur. Með honum í verkefninu eru Kjartan Bergsson og Tamara Roesel sem eru bæði verkfræðingar og störfuðu áður í verkefnastjórnun hjá Kaupþingi.

Skoða erlend útboð

“Við skiptum með okkur verkum og hefur Kjartan verið framkvæmdastjóri, Tamara fjármálastjóri og ég tæknistjóri. Við leggjum áherslu á að funda reglulega og móta næstu skref. Við höfum notað tengslanetið og vefinn okkar ásamt LinkedIn til að fá sérfræðinga til að skrá sig hjá okkur auk þess sem við reynum að nota Internetið við að kynna fyrirtækið fyrir mögulegum viðskiptavinum.”

Að sögn Þrándar hefur Expert verið í samvinnu við VJI verkfræðistofu við að bjóða í verk erlendis á vegum aðila eins og Alþjóðabankanns, Sameinuðu þjóðanna auk verkefna á Evrópska efnahagssvæðinu. Auk þess eru allar aðrar leiðir við verkefnaöflun skoðaðar. “Það hefur gengið rólega að stækka viðskiptavinahópinn, en þó eru nokkur verkefni í gangi hér innanlands.”

Gott er að móta stefnuna upp í ákveðnum skrefum:

1. Megingildi - Hvaða þrjú lykilatriði eiga að mynda grunninn að framtíðarsýn okkar?
2. Hlutverk - Hvert er hlutverk vefsins? Hverjum þjónar hann?
3. Framtíðarsýn - Hvernig lítur vefurinn út eftir eitt ár eða fimm ár?
4. SVÓT - Styrkleikar – Veikleikar – Ógnanir og Tækifæri – Þarf ekki að vera svo flókið að taka saman nokkra punkta um hvern lið.
5. Mælanleg markmið - Setja fram nokkur atriði sem hægt er að mæla. Hversu margir heimsækja vefinn á hverjum degi? Hversu margar heimsóknir skila sér í sölu, áskrift eða öðru sem við viljum ná fram?

Hér er ágætis myndband um hvernig rétt er að nota LinkedIn til að efla tengslanetið (þarft reyndar að skrá þig til að skoða).

Chris Muccio frá LinkToProsper.com segir okkur frá nokkrum atriðum:

• 15 mínútur á dag
• Hvaða árangri vil ég ná fram?
• Byggja “vörumerkið” mitt – hvað get ég? hvað stend ég fyrir?
• Nota LinkedIn skráninguna (profile), LinkedIn Answers, LinkedIn Groups – bæði á vefnum og í raunverulega heiminum
• Fara vel yfir skráninguna mína og nýta alla möguleika vel, m.a. með tengingum á vefina mína og stefna að 100%
• Byggja upp tengslanetið
• Framkvæma!

Við hjá Expert.is erum stöðugt að leita að sérfræðingum og þú getur skráð þig í hópinn hér:

Expert.is – LinkedIn hópurinn

Getur líka skoðað skráninguna mína hér:

http://www.linkedin.com/in/thrandur4×4

Sérfræðingurinn

André er sérfræðingur…

Hann er ekki:

• Starfsmannastjóri
• Markaðsstjóri
• Skipulagsstjóri
• Öryggisstjór
• Samskiptastjóri
• Upplýsingatæknistjóri
• Verkefnastjóri
• Skriftstofustjóri
• Almannatengslastjóri
• Vöruþróunarstjóri

Samt sem áður nær André að ljúka verkefninu

SVEF eru samtök vefiðnaðarins. Þau eru nú að halda ráðstefnu um veflausnir og veita síðan Íslensku vefverðlaunin 2008. Ég ætla að mæta og hvet þig til að gera það líka ef þú getur þar sem ráðstefnan er ókeypis fyrir félagsmenn SVEF.

Við minnum á að Íslensku vefverðlaunin 2008 verða veitt í Listasafni Reykjavíkur, Hafnarhúsi þann 30. janúar næstkomandi og hefst dagskráin með hanastéli kl. 17:00.

Fyrr um daginn standa Samtök vefiðnaðarins fyrir ráðstefnu um vefmál þar sem úrval innlendra fyrirlesara munu halda erindi og sitja fyrir svörum. Yfirskrift ráðstefnunnar er Veflausnir.

Ráðstefnan hefst kl. 14:00 og er aðgangur ókeypis fyrir félagsmenn SVEF.

Athugið að nauðsynlegt er að skrá sig á ráðstefnuna. Félagar í SVEF geta smellt hér til að skrá sig á ráðstefnuna. Nýir félagar geta skráð sig á ráðstefnuna um leið og þeir skrá sig í félagið.

Veflausnir ráðstefna – dagskrá:

Uppskeruhátíð vefiðnaðarins
- ávarp frá Samtökum vefiðnaðarins.
Markaðssetning í núverandi umhverfi
- Magnús Bergsson, Framkvæmdastjóri Sölusviðs EVE.Online.
Dótakassi vefstjórans
- Einar Gústafsson, vefstjóri Nýja Glitnis.
Open source í daglegum rekstri
- Frosti Sigurjónsson, Framkvæmdastjóri og stofnandi DoHop.
Kreppuspilið – frá hugmynd að veruleika
- Jónas Björgvin Antonsson framkvæmdastjóri Gogogic
Hugmyndaráðuneytið
- Guðjón Már Guðjónsson, frumkvöðull og framkvæmdastjóri Industria.
Upplýsingabyltingin: Sagan er ekki lengur skrifuð af sigurvegaranum
- Þórlaug Ágústsdóttir, stjórnmálafræðingur og formaður SVEF.

Til úrslita Vefverðlaunanna 2008 keppa:

Besti sölu- og þjónustuvefurinn

• Borgarleikhús (www.borgarleikhus.is)
• Flugfélag Íslands (www.flugfelag.is)
• Icelandair.is (www.icelandair.is)
• Miði.is (www.midi.is)
• Síminn (www.siminn.is)

Besti fyrirtækjavefurinn

• Bláa lónið (www.bluelagoon.com)
• Ísafold Travel (www.isafoldtravel.is)
• Marel (www.marel.com)
• Pósturinn (www.postur.is)
• Síminn (www.siminn.is)

Besti vefur í almannaþjónustu

• Akraneskaupstaður (www.akranes.is)
• Fasteignaskrá Íslands (www.fasteignaskra.is)
• Ísland.is (www.island.is)
• Pósturinn (www.postur.is)
• Veðurstofa Íslands (www.vedur.is)

Besti afþreyingarvefurinn

• Kvikmyndir.is (www.kvikmyndir.is)
• Iceland Socks (www.myicelandsocks.com)
• Skjárinn (www.skjarinn.is)
• Tónlist.is (www.tonlist.is)
• Vísir (www.visir.is)

Besta útlit og viðmót

• Flugmálastjórn Íslands (www.caa.is)
• Icelandair (www.icelandair.is)
• Ísafold Travel (www.isafoldtravel.is)
• Pósturinn (www.postur.is)
• Síminn (www.siminn.is)

Besti einstaklingsvefurinn

• 24×24 (www.24×24.is)
• Brjóstakrabbamein (www.brjostakrabbamein.is)
• Cafe Sigrún (www.cafesigrun.com)
• Hjartalíf (www.hjartalif.is)
• Indefence (www.indefence.is)

Að auki verða veitt sérstök verðlaun - Besti íslenski vefurinn 2008 og Bjartasta vonin 2008 úr hópi allra þeirra vefja sem keppa til úrslita.
Stjórn SVEF
Kær kveðja,

Loksins er kominn maður sem þorir að taka umræðuna um framtíð Íslands á næsta stig.

Allt of mikill tími hefur farið í að sannfæra ríkisstjórnina um að hún er löngu fallin. Í dag áttaði Björgvin G. Sigurðsson sig á því og sagði af sér (og er meiri maður fyrir).

Það er líka mikið áhugaverðara að horfa fram á veginn og ég er sammála því að það þarf að búa til alveg nýtt lýðveldi á Íslandi. Þess vegna styð ég þetta framtak og hvet þig til að gera það líka:

Nýtt Lýðveldi

Að þessari undirskriftarsöfnun stendur hópur Íslendinga sem telur brýnt að hefjast nú þegar handa við að endurreisa traust í þjóðfélaginu og efla virðingu fyrir reglum lýðræðis og grundvallarstofnunum samfélagsins.

Fólkið í landinu þráir nýtt upphaf og nýjar leikreglur ásamt endurreisn þeirra gilda sem þjóðin hefur um aldir lagt rækt við, gilda á borð við heiðarleika, samvinnu, ábyrgð og jöfnuð.

Við viljum með þessu framtaki mynda þverpólitíska breiðfylkingu um þau markmið sem koma fram í áskoruninni til forseta og Alþingis.

Hópurinn er óháður öllum stjórnmálaframboðum og hagsmunaöflum.

Njörður P. Njarðvík,

Ólína Þorvarðardóttir,

Tryggvi Gíslason,

Birgir Björgvinsson.

Baggalútur er alltaf með hressari og skemmtilegri böndum. Í þessu lagi tekst þeim að benda á flest það sem aflaga hefur farið á Íslandi þetta ár sem nú er að líða.

Varla miklu við þetta að bæta. Segi bara:

Gleðileg Jól og farsælt komandi ár. Vonandi verður næsta ár betra en þetta og nýtt Ísland verði til á grunni rústanna.

Til að sækja lagið og fræðast meira um lagið…

Hér er svo textinn:

ÞAÐ KOMA VONANDI JÓL

Allflestar útgönguspár
eru á eina lund;
þetta var skelfilegt ár.
Hér út við heimskautsins baug
hnípin þjóð – þráðbeint á höfuðið flaug.

Allt þetta útrásarpakk
át á sig gat
svo loftbólan sprakk.
Nú eru lífskjörin skert, mannorðið svert,
Hvað hafið þið gert?

Það koma vonandi jól
með hækkandi sól.
Við skellum könnu upp á stól
og Sollu í kjól.
Þrátt fyrir allt
þrátt fyrir verðbólguskot
– þjóðargjaldþrot.

Við áttum íbúð og bens
og orlofshús.
Allt meikaði sens.
Góðgerðir gáfum og blóð
greiddum í – dulítinn séreignasjóð.

En nú er allt þetta breytt og eftir er
nákvæmlega ekki neitt.
Já nú er útlitið dökkt
ljósið er slökkt
og við erum fökkt.

Það koma vonandi jól
með hækkandi sól.
Þó vanti möndlu í graut
og amerískt skraut.
Þrátt fyrir allt
þrátt fyrir háðung og smán
– myntkörfulán.

Það koma vonandi jól
með hækkandi sól.
Við étum á okkur gat
af innlendum mat.
Og þrátt fyrir allt
misnotum sykur og salt.

Það koma vonandi jól
með hækkandi sól.
Við krössum afmælið hans
– heimslausnarans.
Því að þrátt fyrir allt
drekkum við mysu í malt.

Sá nefninlega þessa færslu hjá Agli Helga:

Ég styð Obama…

….í því að hætta ekki að reykja…

Egill Helgason er nú skemmtilegur og allt það en stundum má hann aðeins passa sig. Ég er allavega svolítið hissa á þessari yfirlýsingu. Kannski er þetta spurning um pólitíska rétthugsun hjá honum

Fyrir nokkrum árum var ég að vinna þar sem reykingar voru leyfðar í KAFFISTOFUNNI. Reyndar bara við eitt borð en í þessari litlu kaffistofu skipti það litlu máli þegar 4-5 kellingar (*) kveiktu sér í sígarettum og fóru að púa. Þar með fór matarlystin fyrir lítið og andrúmsloftið (það litla sem var eftir) var að auki hlaðið spennu þar sem ekki voru allir sáttir við að anda að sér menguðu lofti.

Smám saman hefur verið unnið að því að þrengja að reykingamönnum með reglugerðum og lögum og finnst sjálfsagt sumum gengið of hægt og öðrum of hratt.

Manni dettur nú í hug það sem einhver góður maður sagði einu sinni að “Frelsi þitt endar þar sem nefið á mér byrjar.”

Auðvitað er Obama “stór strákur” en vona samt að hann geri það sem er skynsamlegast. Ég er allavega of “lítill” og vona að fleiri komist að því að þeir eru það líka.

(*) Fyrir pólitíska rétthugsun er rétt að geta þess að ég nota þetta orð jafnt um karlkyns sem kvenkyns kellingar.